کاموکی نیوز (رپورٹ): وفاقی حکومت نے مہنگائی کی ستائی عوام
پر پیٹرولیم مصنوعات کی قیمتوں میں ہوشربا اضافے کا ایک اور بم گرا دیا ہے۔ حکومت نے پیٹرول اور ہائی اسپیڈ ڈیزل کی قیمتوں میں 26 روپے 77 پیسے فی لیٹر کا اضافہ کر دیا ہے، جس کے بعد پیٹرول کی فی لیٹر قیمت تاریخ کی بلند ترین سطح پر پہنچ گئی ہے۔
حکومت کی جانب سے جاری کردہ نوٹیفکیشن کے مطابق، پیٹرولیم مصنوعات کی نئی قیمتوں کا اطلاق آج رات 12 بجے سے ہو چکا ہے۔ نوٹیفکیشن کے اجرا کے بعد اب پیٹرول کی نئی قیمت 393 روپے 35 پیسے اور ڈیزل کی نئی قیمت 380 روپے 19 پیسے فی لیٹر مقرر کی گئی ہے۔
پیٹرولیم مصنوعات کی قیمتوں میں اس بھاری اضافے کے بعد ملک بھر میں شدید تشویش کی لہر پائی جا رہی ہے۔ ماہرینِ معاشیات کا کہنا ہے کہ ایندھن کی قیمتوں میں اس اضافے سے ٹرانسپورٹ کے کرایوں اور اشیائے خوردونوش کی قیمتوں میں مزید خود کار اضافہ ہو گا، جس سے پہلے ہی مہنگائی کے بوجھ تلے دبی عوام کی کمر ٹوٹ جائے گی۔
حکومتی ذرائع کے مطابق، عالمی منڈی میں خام تیل کی قیمتوں میں اضافے اور مقامی کرنسی کی قدر میں اتار چڑھاؤ کے باعث قیمتوں میں ردوبدل ناگزیر تھا۔ تاہم، عوام اس اضافے کو براہِ راست اپنی قوتِ خرید پر حملہ قرار دے رہے ہیں۔
کاموکی سمیت ملک بھر کے مختلف شہروں میں شہریوں نے حکومت سے مطالبہ کیا ہے کہ غریب عوام کو ریلیف فراہم کرنے کے لیے پیٹرولیم مصنوعات پر عائد ٹیکسز میں کمی کی جائے تاکہ مہنگائی کا طوفان رک سکے۔
Comments
Post a Comment